Ali Pedaqoji İnstitut yaradılarkən burada təşkil edilən üç şöbədən biri Fizika-riyaziyyat şöbəsi olub. Şöbənin ilk rəhbəri (dekanı) Məmməd bəy Əfəndiyev olub. İlk tədris ilində şöbənin əsas fənn müəllimi Məmməd Əfəndiyev idi. İkinci tədris ilində fizika müəllimi Rəhim Məlikov və təcrübə məşğələlərini aparmaq üçün H.V.Berq şöbəyə işləməyə dəvət olundular. Az sonra Peterburq Universitetinin Fizika-riyaziyyat fakültəsinin məzunu Bəhram Mirzəyev də Ali Pedaqoji İnstituta dəvət edildi. Şöbənin 1924-cü ildə 9 nəfərdən ibarət ilk məzunu oldu ki, onlardan da 7 nəfəri riyaziyyat müəllimi idi. Şöbəni 1925-ci ildə 6, 1926-cı ildə 24, 1927-ci ildə 17 nəfər bitirdi. Ali Pedaqoji İnstitut 1927-ci ildə ADU-nun Pedaqoji fakültəsi ilə birləşdiriləndə fizika-riyaziyyat şöbəsi eyni adı fakültə ilə birləşdirildi. 1930-cu ildə Ali Pedaqoji İnstitut yenidən təşkil edilərkən burada fəaliyyətə başlayan fakültə- lərdən biri də Təbiyyat-riyaziyyat fakültəsi (dekan Mehdi Əliyev) oldu. Fakültənin nəzdində riyaziyyat fənləri ilə bağlı iki kafedra fəaliyyət göstərirdi: Riyaziyyat kafedrası (dos.M.Əfəndiyev), Riyaziyyat metodikası kafedrası (prof.A.Ammosov). 

Riyaziyyat kafedrasında dos.Məmməd Əfəndiyev, dos.A.X.Usubbəyova, prof.Məmməd Əliyev, Bəhram Yusifzadə, Abdulla Tahirzadə, Tağı Namazzadə, Abdulla Təmrazlı və b, Riyazyyat metodikası kafedrasında prof.A.Ammosov, Tahir Abdullayev və b. çalışırdı.

Fizika-riyaziyyat fakültəsinə 1934-1936-cı illərdə dos.Məmməd Əfəndiyev, 1936-1938-ci illərdə Bəhram Yusifzadə, 1938-1941-ci illərdə Abbasqulu Abbaszadə rəhbərlik etmişdir.